§1 Formål 

Ordninga med følgjekort er eit verkemiddel for auka deltaking og likestilling i samfunnet ved at personar med funksjonsnedsetting kan ha med seg ein følgjeperson utan ekstra kostnadar. Ein ønskjer med denne ordninga å førebygge isolasjon og betre livskvaliteten til den enkelte. 
Ordninga gjeld for personar som har ei funksjonsnedsetting som vil vare minst 2 år.
Den som ønsker følgjekort må søke til sin bustadkommune. Ordninga gjeld for heile landet på dei stadane som aksepterer ordninga.

§2 Funksjonshemming

Med funksjonsnedsetting meiner ein tap eller skade på ein av kroppens funksjonar. Dette kan vere både fysiske, psykiske eller kognitive funksjonar.

§3 Følgje

Følgje er den som til ein kvar tid er med personen med funksjonsnedsetting. Ein kan ha med ulike personar som følgjeperson frå gang til gang.
Følgjekortet gir vanlegvis rett til å ha med ein følgjeperson. Ved særlege behov kan ein få innvilga to følgjepersonar, ein må då ha med dokumentasjon på dette frå lege eller spesialisthelseteneste.

§4 Følgjekort 

Eit følgjekort er eit kort som personen med funksjonsnedsetting har med seg. På kortet skal det vere namn, bilete, dato for kor lenge kortet er gyldig og kommunenamn. Det skal også stå om personen har rett på ein eller to følgjepersonar.
Følgjekortet er gratis og vil gi følgjepersonen gratis tilgang til offentlege kultur- og fritidsarrangement og offentlege transportmiddel. Det er også mange private aktørar som aksepterer følgjekort. Dei har ofte det offentlege symbolet på følgjekortet synleg.

§5 Aldersgrense

Det er ikkje lenger øvre eller nedre aldersgrense for å få følgjekort. For barn under skolealder må ein ha særskilt dokumentasjon av lege eller spesialisthelseteneste at barnet har eit større behov for følgje enn det som er normalt når barnet ikkje har ei funksjonsnedsetting. Det er for å hindre at det blir ekstra utgifter for familien samanlikna med andre familiar. 
Høg alder er ikkje aleine nok til å kvalifisere for ordninga. Det må også vere ei varig funksjonsnedsetting.

§6 Søknad 

Søknad om følgjekort må gjerast til heimstadkommunen på eige skjema. Ein må legge ved bilete. Digitalt skjema krev at ein loggar inn via ID porten. Ved behov kan kommunen innhente utsegn frå lege, spesialisthelseteneste, psykolog, helseinstitusjon eller kommunen sin helse- og omsorgsteneste.

§7 Periode 

Kommunen vurderer kor lenge følgjekortet er gyldig. Vanlegvis er det gyldig i tre år.

§8 Klage 

Vedtak om følgjekort er eit enkeltvedtak. Med heimel i Forvaltningslova kan ein klage på dette vedtaket til det kommunale klageorganet.