Løvikremma er eit eksempel på ein fiskarbonde sitt gardsbruk på Romsdalskysten. Frå husa er det utsikt mot fjord, holmar og skjær og fjella på fastlandet.

Garden er eit levande museum og er eit samarbeidsprosjekt mellom Aukra kommune, grunneigar og Romsdalsmuseet. Drifta av garden er no ein del av kulturformidling til barnehagar, skuleklassar, næringsliv og andre gjester.

Garden består av våningshus, løe, stabbur og torvsjå. Våningshuset vart bygd i 1861. Under krigen okkuperte tyskarane Løvikremma og brukte løa som kino og teatersal. Scena, med måla dekorasjon på bakveggen, står framleis.

Den gongen garden vart bygd, var han av dei største gardane på Aukra. Det budde folk her fram til 1979.