Om Årets Aukraværing

Juryen var samstemte om at vinnaren i aller høgaste grad fyller vilkåra som ligg til grunn for å få utmerkinga Årets Aukraværing. Prisen kan gå til personar, bedrifter eller organisasjonar som på ein eller annan måte har utmerka seg det siste året. Juryen verdsett eit stort engasjement, pågangsmot og evne til å sjå og hjelpe andre. Dette er også skildrande ord om vinnaren.

• I dag skal vi heidre ein person som har eit unikt engasjement for å skape aktivitet i Aukra. Dette er ein person som representerer det beste av frivilligheita, ei ekte eldsjel som har eit stort og oppriktig ønske om å gjere ein forskjell for andre.
• Med eit stort pågangsmot og eit hjarte for fellesskapet har ho bygd opp aktivitetar og møteplassar som gir både meistring, tilhøyre og livsglede. Ho set seg mål og gjennomfører. Med ein sjeldan kombinasjon av varme, handlekraft og uthaldenheit har ho skapt eit trygt, inkluderande og aktivt fellesskap for menneske med ulike helseutfordringar. Aktivitetar som fremmar fysisk aktivitet og førebygging av helseplager, men også fellesskap og førebygging av einsemd.
• Som leiar blir ho omtalt som dyktig og ein god motivator og gjennomførar. Ho blir skildra som idérik, omtenksam, ei som ser kvar enkelt og ønskjer å hjelpe der det trengs. Juryen har spesielt merka seg at med gode hjelparar rundt seg har ho vore primus motor for mange nye aktivitetar og tilbod det siste året. Her kan nemnast: teppecurling, voksing av hender, qigong, temamøte, trening med rettleiing på treningssenter, i tillegg til å leie den mangeårige bassengtreninga. Ho er også frivillig hjelpar når demenskoret Nordavind har sine øvingar.
• Gjennom sitt arbeid har ho vist kva frivillig innsats kan bety – både for enkeltmennesket og for samfunnet som heilheit. Ho har også satt Aukra på kartet gjennom deltaking og verv på fylkesnivå.

Juryen er ikkje i tvil om at vinnaren bidreg nettopp til det som står i statuttane: Å gjere Aukra til ein «fole bra» kommune å bu i. Utmerkinga Årets Aukraværing 2026 blir gitt til: Astrid Johanne Pedersen, leiar for Aukra Revmatikerforening.