Med støtte frå regjeringa frir vi til innovasjonsmiljø

Auka kostnader, fleire brukarar og knappleik på fagfolk gjer at vi må tenke heilt nytt om helse- og omsorgstenestene framover. Men korleis? Med pengar og hjelp frå regjeringa så frir vi til nasjonale innovasjonsmiljø!

Sjå video der kommunedirektør Marianne Stokkereit Aasen og assisterande kommunalsjef Siri Haukaas i Molde kommune presenterer prosjektet “helse og velferd - på veg mot 2040” i Oslo. Målet var å få eksterne leverandørar til å hjelpa til i arbeidet. Hustadvika kommune er med i dette samarbeidsprosjektet.

Vi får drahjelp frå regjeringa

Regjeringa støttar innovasjonsarbeidet vårt gjennom såkalla «Stimulab»-midlar. Dei har valt ut tre prosjekt i 2025 som til saman får 9 millionar kroner. Eitt av dei er det interkommunale prosjektet «Helse og velferd – på veg mot 2040».

Nytt namn og ny giv!

I samarbeidsprosjektet, som opphavleg vart kalla «Tid for handling», er det mange med på laget: GassROR IKS, kommunane Hustadvika, Molde, Kristiansund, Aukra, Rauma og Vestnes, og dessutan Høgskolen i Molde, Helse Møre og Romsdal HF og Helseinnovasjonssenteret AS.

Deltakarkommunane skal i fellesskap identifisere, teste og evaluere tiltak som kan bidra til større balanse mellom tenestebehov og tilgjengelege ressursar.

Her blir det læring på tvers og styrkte samarbeid! Målet er å bygge løysingar med nasjonal overføringsverdi, tilpassa dagen og morgondagen sine innbyggjarbehov.

Prosjektet blir rigga i løpet av hausten og startar opp mot slutten av 2025.

Kva er Stimulab?

Stimulab er ei ordning som støttar statlege og kommunale verksemder som vågar å tenke nytt om roller og system, og som er villige til å endra desse for å levere betre tenester til brukarane. Gjennom tilskot og fagleg rettleiing til enkeltprosjekt aukar Stimulab innovasjonskapasitet og -kompetanse i dei offentlege verksemdene.

Eit viktig mål for Stimulab er bidra til at heile forvaltninga får auka kunnskap om og erfaring med innovative arbeidsmåtar, med utgangspunkt i brukarbehov.

Les meir om simulab 2025 på regjeringen.no

Publisert 27.06.2025 11.49
Sist endra 27.06.2025 11.58