Formålet er å leggje til rette for etablering av varierte og attraktive bustader i kommunen, tilpassa ulike behov og målgrupper, i tråd med vedteken bustadpolitisk plan i Aukra kommune.

Kommunen ønskjer å kome i dialog med aktørar som har interesse for å utvikle eitt eller fleire av dei aktuelle områda, og å avklare korleis kommunen kan bidra til at prosjekta kjem i gang.

Aukra kommune har vedteke å gjennomføre sanering av kommunale formålsbygg for totalt kr 9,5 millionar i perioden 2026–2027, med atterhald om at kostnadskalkylane er førebelse og kan endre seg. Dette gjeld mellom anna for område 2, 3 og 4 i omtalen under.

Kommunen ser føre seg at områda kan utviklast med ulike bustadløysingar, til dømes aldersvennlege bustader, bustader organiserte som burettslag eller sameige, bustader med tilvisingsavtalar, omsorgsbustader, bustader for førstegongsetablerarar, utleigebustader, bufellesskap og liknande. Andre konsept og idéar er òg velkomne.
Det vert lagt vekt på fleksibilitet og rom for ulike buformer og samarbeidsmodellar.

Prosess og rammer

Dette er ikkje ei konkurranse etter forskrift om offentlege anskaffingar (FOA). Prosessen gjeld ikkje inngåing av byggje- eller tenestekontrakt for kommunen, men mogleg sal/utviklingsavtale som grunneigar. Kommunen opptrer som grunneigar og ønskjer gjennom prosessen å få fram aktørar og prosjekt som kan bidra til god og variert bustadbygging i kommunen.

Kunngjeringa er ikkje bindande for kommunen og inneber inga plikt til å inngå avtale eller selje eigedommane.

Kommunen vil gjere ei samla vurdering basert på beste konsept for den enkelte eigedom, og ber om bod med intensjon-/opsjonsføresetnad for kvar eigedom. Endeleg avtale krev politisk godkjenning. Pris og vilkår skal vere marknadsmessige.

Kommunen vil vurdere innkomne forslag samla, og tek atterhald om retten til å:

• gå vidare med éin, fleire eller ingen aktørar
• avvise forslag utan plikt til å gje nærare grunngjeving
• avbryte prosessen

I samsvar med den bustadpolitiske planen for Aukra kommune vil kommunen vurdere eventuell prisreduksjon eller gratis tomt opp mot reglane om offentleg støtte.

Område 1

• Eigedom: Svingen – gnr. 13 bnr. 413 i Aukra kommune.
• Eigedomen er ferdig regulert til bustadformål.
• Kommunen ønskjer konkrete forslag frå utbyggjarar til kva som kan utviklast på eigedomen.

Område 2

• Eigedom: Gamle Aukra vidaregåande skule – Holmesundet 4, gnr. 1 bnr. 298 i Aukra kommune.
• Kommunen ønskjer konkrete forslag til utvikling av eigedomen. Det er viktig at eigedomen vert regulert og utvikla i tråd med kommunen sine politiske mål om eit attraktivt bustadområde med moderne, tiltalande og funksjonelle bustader.
• Sanering av eksisterande bygningsmasse vil kunne gi gode føresetnader for utvikling av eigedomen. 

Område 3

• Eigedom: Gamle Aukraheimen – Aukravegen 303, gnr. 13 bnr. 30 i Aukra kommune.
• Eigedommen er under frådeling og det vil bli nytt gnr. og bnr. 
• Kommunen ønskjer konkrete forslag til utvikling av eigedomen. Kommunen vil vurdere omregulering etter plan- og bygningslova i ordinær politisk prosess, og i dialog med aktuell utbyggjar.
• Eksisterande småhus og hjelpemiddelsentral som er oppførte på tomta, vil bli frådelte eigedomen og inngår ikkje i avhendinga.

Før frådeling:

Etter frådeling:

Sanering av eksisterande bygningsmasse vil kunne gi gode føresetnader for utvikling av eigedomen.

Område 4

• Eigedom: Aukraringen 8 – delar av gnr. 13 bnr. 160 i Aukra kommune.
• Området er regulert til kombinert bebyggelse.
• Det kan vere aktuelt å dele området inn i byggetrinn med eigne gnr./bnr. etter forslag frå tilbydar. Kommunen vil omregulere området i samråd med vald utbyggjar og ønskjer konkrete forslag til utvikling av tomta.

Område 5

• Eigedom: Nautnesvegen 96 – gnr. 13 bnr. 9 i Aukra kommune.
• Området er regulert til kombinert bebyggelse. Kommunen ønskjer konkrete forslag til utvikling av tomta.
• Det vart i Aukra kommunestyre den 11.12.2025 vedteke sanering av bustadhus, garasje og løe på eigedomen. Det skal leggjast til rette for at bustadhuset kan nyttast som øvingsobjekt for brannvesenet i samband med saneringa.

Frist og kontakt

• Frist for å sende inn interesse og forslag er måndag 23. mars 2026 kl. 12:00.
• Send forslag og førespurnadar til Aukra kommune sitt postmottak post@aukra.kommune.no
• Ved spørsmål kan du ta kontakt med driftsleiar eigedomsavdeling Ragnhild Sandøy Hovind eller kommunalsjef samfunnsutvikling Geir J. Göncz.

Ta kontakt med Ragnhild Sandøy Hovind

Ta kontakt med Geir J. Göncz