Bakgrunnen er at kommunane nyleg har fått tilsendt fleire omfattande rapportar knytte til omstillingsprosjekt innan poliklinikkdrift, optimalisering av døgndrift, kartlegging av oppgåver utanfor spesialisthelsetenesta sine kjerneoppgåver og utviklinga av SNR Kristiansund. Fristen for innspel er sett til 9. november, medan styret i Helse Møre og Romsdal HF skal behandle sakene allereie 20. november.
Formannskapet meiner tidsramma er for knapp til at kommunane kan gjennomføre nødvendige faglege vurderingar og sikre forsvarleg administrativ og politisk behandling av sakene.
– Når kommunane får mindre enn to veker til å setje seg inn i omfattande utgreiingar med potensielt store konsekvensar for økonomi, kompetansebehov og tenestetilbod, er det vanskeleg å sjå at dette kan kallast reell medverknad, seier ordførar Helge Kjøll.
Formannskapet viser til samarbeidsavtalen mellom kommunane og Helse Møre og Romsdal HF, som legg til grunn at partane skal involvere kvarandre så tidleg som mogleg ved planlagde endringar som påverkar den andre parten. Etter kommunen si vurdering er ikkje denne føresetnaden oppfylt når kommunane først blir involverte etter at rapportane er ferdig utarbeidde og behandla i programstyret.
På grunn av prosessen og den korte fristen har Aukra kommune valt å ikkje gi realitetsmerknader til dei aktuelle rapportane. Kommunen si tilbakemelding avgrensar seg difor til ein prinsipiell kritikk av prosessen.
Formannskapet forventar at Helse Møre og Romsdal HF i framtidige omstillingsprosessar involverer kommunane på eit tidlegare tidspunkt og legg til rette for reell medverknad innanfor forsvarlege tidsrammer.
– Gode og berekraftige helsetenester krev eit likeverdig samarbeid mellom kommunane og spesialisthelsetenesta. Kommunal medverknad må vere reell, ikkje berre formell, seier Kjøll.
Formannskapet understrekar at dersom prinsippa i samarbeidsavtalen ikkje blir følgde opp, vil det vere naturleg å vurdere kva formelle verkemiddel kommunen har til rådvelde for å sikre at avtalen blir etterlevd.
Aukra kommune