Husleigesatsar frå 01.01.2024:

Husleiga for kommunale bustader er frå kr 3 773 kr til kr 9 065 kr.

§ 1 Verkeområde

Retningslinene skal leggast til grunn for behandling av søknad om kommunal midlertidige utleigebustad i Aukra kommune. Alle kommunale utleigebustadar skal tildelast i samsvar med desse retningslinene.

§ 2 Kommunal bustad

Med kommunal utleigebustad meinast bustadar kommunen disponerer til utleigeføremål. Retningslinene gjeld butilhøve som har si forankring i avtalar om bruksrett til husrom mot vederlag, jf. husleieloven § 1-1.

Retningslinene gjeld ikkje søknadar om opphald i institusjon eller omsorgsbustadar.

Kommunale utleigebustadar er eit verkemiddel for å hjelpe vanskelegstilte på bustadmarknaden, og er som hovudregel meint å vere eit mellombels bustadtiltak.

Tildeling av kommunal bustad er eit av fleire moglege hjelpetiltak kommune kan setje i verk ovanfor personar som er vanskelegstilt på bustadmarknaden. Dersom vedkomande oppfyller krav på bistand frå kommunen, må kommunen vurdere andre formar for bistand om vedkomande ikkje kan hjelpast med kommunal bustad, fordi det ikkje er tilgang til dette eller av andre grunnar, jf. boligsosialloven § 6.

§ 3 Målgruppe og rett til bustadsosial bistand - enkeltvedtak og klagerett

Målgruppa er vanskelegstilte personar som sjølv ikkje kan ivareta interessa si i bustadmarknaden. Vurderinga av vilkåret er individuell.

Når ein ved søknad eller på annan måte ber om bistand frå kommunen, skal kommunen ta stilling til om personen er vanskelegstilt på bustadmarknaden. Ei avgjerd av om søkjar fyller vilkåra i første ledd er eit enkeltvedtak. Statsforvaltaren er klageinstans, jf. boligsosialloven § 7.

§ 4 - Noverande bustadtilhøve

Søkjar må på søknadstidspunktet ha lovleg opphald i Noreg, budd i Aukra dei siste 2 åra og vere eller vere i ferd med å bli, utan eigna bustad. Butida må kunne dokumenterast ved utskrift frå Folkeregisteret.

Det kan gjerast unntak frå kravet til registrering i Folkeregisteret dersom søkjar på annan måte kan dokumentere faktisk butid.

I særlege høve kan det gjerast unntak, både frå kravet om faktisk butid og kravet til dokumentasjon av denne:

1. når andre særlege grunnar gjer kravet til butid og/eller dokumentasjon av butid urimeleg
2. ved søknad frå personar som grunna kulturell reiseverksemd ikkje har opparbeid butid i Aukra
3. det er ikkje krav til butid for flyktningar som etter avtale mellom Staten og Aukra kommune skal busettast for første gong i Aukra.

§ 5 - Alder, krav og rettigheiter for søkjar

Søkjar må på søknadstidspunktet vere fylt 18 år. Dersom søkjar er under 18 år skal saksbehandlinga skje i samarbeid med pårørande, verje og/eller tenesteapparat.

Flyktningar som skal busettast i Aukra kommune etter vedtak fatta av kommunestyret har, om anna bustad ikkje vert stilt til disposisjon, rett til kommunal bustad som førstegongstildeling. Tilsvarande gjeld ved familiegjenforeining, der herbuande har vore busett i mindre enn fem år og ikkje sjølv disponerer eller kan skaffe tilfredsstillande bustad.

§ 6 - Søkjarar med behov for tenester og oppfølging i bustaden 

Søkjarar som har omfattande tenester frå hjelpeapparatet, kan tildelast bustad så framt bustaden har betydning for eit heilskapleg tilbod.

Søkjarar som tidlegare har misleghalde leigetilhøvet, kan etter ei konkret vurdering bli tildelt bustad. Dette under føresetnad av at vedkomande har inngått eit målretta samarbeid med tenesteapparatet, sjå § 10 i retningslinene

§ 7 - Inntekt- og formuetilhøve

Ved vurdering av søknad om kommunal midlertidig bustad skal søkjar sine økonomiske forhold inngå som eit av fleire moment i ei samla heilskapsvurdering.

§ 8 - Søknad

Søknad om kommunal midlertidig bustad skal sendast digitalt via aukra.kommune.no og skjema ‘’søknadsskjema kommunal bustad’’ skal nyttast: Kommunal bustad - Aukra kommune

Kommunen kan, utan hinder av teieplikta, innhente opplysningar som er nødvendige for å utføre oppgåver etter denne lova frå Folkeregisteret og Skatteetaten, jf. boligsosialloven § 9.

Søkjar pliktar å gi relevante og korrekte opplysningar som har betydning for saka.

§ 9 - Prioritering 

Om talet på søkjarar som fyller grunnkrava i krav til søkar er større enn talet på kommunale bustader til disposisjon, skal det gjerast ei prioritering mellom elles kvalifiserte søkjarar. Ved prioritering skal det leggast vekt på søkjarane sine ulike behov og kva type bustad som er tilgjengeleg. Det er i nokre høve høve til å ta omsyn til at nokre buformer stiller spesielle krav til samansetting av bebuarar.

§ 10 - Mislighald av tidlegare kommunalt leigeforhold 

Dersom søkjar tidlegare har mislighalde økonomiske eller kontraktsmessige forpliktingar knytt til kommunalt leigeforhold, er det som hovudregel ein føresetnad at det vert inngått ein nedbetalingsavtale på husleigerestanse, evt. fullt oppgjer, før vedkomande vert tildelt ny kommunal bustad. Tildelinga kan óg skje dersom søkjar kan dokumentere endra forhold eller inngått samarbeid med relevant tenesteapparat som reduserer risiko for nytt mislighald.

§ 11 – Vedtak om tildeling og klagerett 

Kommunedirektøren, eller den som har fått delegert mynde, fattar vedtak om tildeling av kommunal bustad.

Det kan stillast vilkår i vedtak om tildeling av kommunal bustad, til dømes at søkjar samtykkjer til å ta imot oppfølging i bustaden eller andre frivillige hjelpetiltak.

Vedtak om tildeling eller avslag på søknad om bustad, vert sendt skriftleg til søkjar med grunngjeving. Det skal visast til gjeldande regelverk.

Vedtaket om tildeling er eit enkeltvedtak, og saksbehandlinga følgjer Forvaltningslova. Vedtaket kan klagast på til kommunen sitt særskilde klageorgan, jf. Forvaltningslova § 28, 2. ledd.

Vedtak etter denne føresegna gjeld ikkje vurderinga av rett til bustadsosial bistand etter § 3

§ 12 - Leigetid og fornying av leigeavtale 

Kommunale bustader har maksimum ein tidsavgrensa leigeavtale på 3 år, Leigeavtalen kan vere kortare. Søknad om forlenging av husleigekontrakt vert vurdert etter gjeldande regelverk. Ein slik søknad må ligge føre innan 3 månadar før opphøyr av leigekontrakt.

Når kommunen fattar nytt vedtak, skal kommunen samtidig vurdere om søkjar skal tildelast annan eigna bustad som er meir tilpassa husstanden sin noverande situasjon.

§ 13 - Leigekontraktar – mellombels eller varig vanskelegstilt

Kommunen skal vurdere om søkjar har eit mellombels eller meir langvarig behov for bustad, og på bakgrunn av dette tilby anten ein kortvarig eller meir langvarig leigekontrakt.

Vurderinga er tidsavgrensa og skal gjerast på nytt ved søknad om forlenging av leigeforholdet

§ 14 - Bytte av kommunal bustad

Søknad om bytte av kommunal bustad kan berre innvilgast når: bustaden er ueigna av helsemessige årsaker, husstanden har vorte større eller andre tungtvegande forhold tilseier bytte av bustad Grunnlaget for bytte skal dokumenterast.

§ 15 - Endring av vedtak om leige av kommunal bustad 

Vedtaket kan endrast når:

1. søkjar utan sakleg grunn avslår tilbod om tildelt bustad
2. søkjar sin situasjon er vesentleg endra frå søknadstidspunktet til tidspunktet for inngåing av leigekontrakt.

Dersom vedtak om leige av kommunal bustad fell bort etter punkt a) eller b) ovanfor, skal det fattast endringsvedtak. Avgjerda er enkeltvedtak. Det er klagerett på enkeltvedtaket, jf. § 3 i retningslinene.

§ 16 - Oppfylling av vedtak om leige av kommunal bustad

Vedtaket er å rekne som oppfylt på det tidspunktet det vert inngått leigekontrakt i tråd med vedtaket.

§ 17 - Betaling av husleige

Husleige skal betalast etter rekning frå økonomiavdelinga i Aukra kommune.

§ 18 - Iverksetjing

Regelverket trer i kraft frå det tidspunkt kommunestyret fastsett.

Dette vedtaket er eit enkeltvedtak som du kan klage på. Klagefristen er 3 veker frå du fekk vedtaket frå kommunen. 

Klagen sender du enten per post til:

Aukra kommune
Nyjordvegen 12
6480 Aukra

eller digitalt ved å bruke eDialog.

Du kan òg sende klagen på e-post til post@aukra.kommune.no. Hugs å ikkje sende sensitiv informasjon på e-post.